Cerita Cinta Cindy Charles

Everhard Lumenta



“Sebenarnya qta masi sayang pa ngana, mar qta nda tahang kalu bagini trus…”
Cindy pe kata kaluar sama-sama deng tu aer mata. Dia so nda mampu tahang depe perasaan.
“Cin..?!”
Cuma itu yang bole kaluar dari Charles pe bibir. Dia masi bingo, kage plus tako pas da dengar Cindy pe kata-kata. Sementara Charles cuma da tanganga sama deng biongo, napa Cindy so nda mampu tahang depe rasa pastiu.
“Samua jo for ngana pe tamang ! Sejak torang dua jadi, kalu bole mo rekeng, tu waktu deng tamang lebe banya daripada deng qta !!”
Cindy so mulai se kaluar tu samua yang ada pa depe hati.
“Sapa kwa yang nda mo saki hati ? Masa tiap malam minggu torang pe waktu sama-sama cuma bole sampe jam 9 malam? Ngana pe alasan salalu pulang capat supaya qta pe ajus deng sebe sanang. Padahal sebenarnya ngana suka capat pulang karna dorang so ja tunggu pa ngana. Tamang-tamang pamabo so menanti mo bakuspai deng botol sampe pagi! Qta so ja tarukira, mar qta masi ja tahang-tahang.”
So ja takaluar Cindy pe isi hati, Charles masi tetap tanganga.
“Waktu valentine qta mangiri ja lia tamang laeng yang pi berduaan deng depe paitua, pi bioskop, pi makan malam romantis. Mar torang dua ?? Ngana cuma sibuk urus acara musik di kampus. Ngana lebe bingo cari gitar, drum deng spiker daripada mo bermesraan deng qta. Noh ngana bakuplo jo deng tu barang-barang itu!!
Cindy pe curhat so mulai panas.
“Tu hari le waktu ngana trima beasiswa, qta so harap paling-paling ngana mo bli akang sesuatu supaya tu beasiswa ada depe tandamata. Mungkin ngana mo bli akang dompet ato tas karna qta punya so keas. Mar samua cuma angan-angan, ngana pe beasiswa cuma abis for se sanang ngana pe tamang-tamang anjing, se makan, bli minuman, pi karouke kong baku tamba doi pi main futsal… for qta ?? ngana cuma isi akang pulsa.
Dapa lia Cindy so emosi, Charles nintau mo bagimana.
“Qta le binci pa ngana, nda ja badengar qta pe saran. Dari pertama qta so bilang iko jo kegiatan rohani di kampus, mar ngana cuma pilih ba teater deng maso organisasi musik bakumpul deng pamabo-pamabo. Bagini kalo sama-sama deng qta, mungkin ngana so sarjana. Sampe skarang ngana blum klar-klar kuliah karna bingo urus tu kaderisasi ! .
Charles cuma bole badengar, dia nda ada kesempatan mo klarifikasi, Cindy pe mulu nda brenti-brenti.
“Qta heran kiapa ngana lebe sayang pa tamang-tamang? Ngana inga waktu qta minta tolong jemput di LPM pas klar coaching KKN? Ngana nimbole jemput karna ngana da se pinjam motor pa tamang. Padahal waktu itu pe panas manucu, qta da pake hak tinggi kong lupa bawa payung. Bukang maen dang ngana Charles, waktu itu ngana pe santai da bilang badola jo! .
Rupanya Cindy so kumpul samua tu Charles pe blunder-blunder.
“Ngana le inga tu kaos Jimmi Hendrix yang qta da kase pas ngana pe harijadi? Mana itu skarang? So pa John toh?? Paling kwa ngana da se pinjam waktu dia tidor pa ngana pe rumah pas da bakumpul minum-minum kong bakar kapala ba !.
Charles tetap blum bole kase tanggapan.
“Ngana memang nda pernah serius deng qta! Kalu ngana butul-butul mo suka jalani hidup deng qta, paling ngana so berusaha cepat sarjana kong cari kerja supaya so da modal for mo maso minta ! Mar ngana cuma bingo urus persiapan Bismaba 2010. Inga Charles, ngana itu angkatan 2001 !! Masi suka show so pa ade-ade baru? Pokoknya qta so nda tahang sama-sama deng ngana !
Cindy pe aer mata so kering, mar itu hati masi ganu.
“Kemarin qta so rubah tu status di Facebook… Makase jo, ngana so temani qta pe hari-hari selama di kampus sampe qta so sarjana. Memang qta sayang pa ngana, mar rupanya ngana bukang qta pe tulang rusuk !”
Setelah dengar Cindy pe kata-kata terakhir, mau tak mau Charles musti bereaksi. For Charles ada 2 opsi yang tangiang pa depe pikiran…
- Opsi 1 (Gengsi, Ba Kras)
Cin, ngana pe pikiran so gila, nda maso akal !! masa ngana mo cemburu pa qta pe tamang-tamang? Mo qta lama-lama deng dorang, qta lama mo sarjana, itu qta pe urusan, it’s my life !! Deng qta mo bilang pa ngana … qta lebe dulu baku kanal deng dorang daripada ngana !!
Hasil akhir = PUTUS
Jelas-jelas Cindy mo lebe yakin kalu putus adalah jalan terbaik, Charles lebe pilih pa depe tamang-tamang. Opsi ini bole mo ambe kalu Charles pe tampang sama deng Nicolas Saputra, kalu pun mo putus gampang mo dapa cewe baru. Mar masalahnya Charles bukang Nicolas, dia cuma laki-laki biasa yang mujur bole jadi deng cewe gaga kong bae-bae sama deng Cindy. Dorang da jadi karna Charles so ja manuver sejak Ospek. Kong rajin kerja kelompok, bekeng tugas sama-sama. Charles leh rajin ja tawarkan diri antar pulang pa Cindy pe rumah yang sebenarnya pe jaoh, di Tumaluntung. Entah karena iba da lia Charles so sama deng ojek , akhirnya Cindy io pa Charles. Jadi for Charles ni opsi sangat beresiko. Kemungkinan mo jadi jomblo besar skali. Mar secara laki-laki, ni opsi dapa rasa jantan skali deng menunjukkan tu tingginya rasa persahabatan deng tamang-tamang anjing!
- Opsi 2 (Mangaku salah, Minta Maaf)
Memang selama ini qta biongo skali ! Qta nda mampu jaga torang pe cinta. Qta nda mampu beking ngana bahagia. Jujur, qta yang salah, lebe banya waktu qta se abis deng tamang-tamang. Dorang le katu ja tegor pa qta, kyapa salalu deng dorang trus. Qta akui, apa yang ngana da bilang samua, itu butul ! Qta salah…sori so bekeng ngana kecewa !
Qta minta maaf Cin, Qta yang salah !
Apa yang mo jadi pa qta kalo so nda sama-sama deng ngana?
Sapa le yang mo babonceng pa qta?
Qta nda bisa jaoh-jaoh dari pa ngana…
Qta pe cinta cuma for ngana !
Qta rela se tinggal samua tamang, organisasi deng tu laeng-laeng demi ngana !!
Cuma ngana yang beking ni hidup jadi berarti.
Ngana itu anugrah dari surga… Qta cinta pa ngana !
Qta somo se klar tu kuliah, kong somo cari kerja supaya torang so bole mo kaweng.
Qta suka ngana yang jadi mama for qta pe anak-anak.
Sama deng Gunawan da bilang, biar saribu bintang di langit cuma satu yang qta pilih…
Biar saribu cinta di hati cuma ngana yang qta sayang !!

Cin, jang se putus pa qta … please…?!
Hahahaha, opsi yang cengeng ! Mar setidaknya bole beking luluh Cindy pe hati. Kan parampuang paling suka ja ba gombal akang. Masalah mo ba jaoh pa tamang-tamang, itu tinggal mo stel, dorang pasti mangarti ! Pokoknya nimbole putus … Akhirnya Charles pilih opsi kadua !!
“Cin, jang se putus pa qta ! please…”
Charles pe suara pe dapa sayang da dengar. Napa Cindy pe hati so tasontong. Dia kwa memang masi sayang pa Charles, dia cuma butuh perhatian lebih. Charles pe raut muka so dapalia ba mohon skali. Dia nimau Cindy se putus. Dia suka mo raih masa depan yang indah bersama Cindy .
“Cin, se lupa jo tu qta pe dulu-dulu… se maaf neh pa qta…pokoknya qta mo berubah !”
Charles tetap berjuang.
“Qta suka torang baku sayang trus !! Nda usah putus neh..”
Cindy pe muka so mulai sadiki cerah, mar dia terlanjur gengsi mo bilang nda jadi putus. Bagi Charles, diam brarti io…dia langsung plo pa Cindy. Cinta Charles deng Cindy masi bole mo save, blum disconnect.
Charles tetap plo pa Cindy kong babise..
“Cin, trus terang qta so lapar, manjo ka KFC, pas tre so depe jam attack…”
Cindy leh ternyata so lapar, dia pun langsung jawab :
“ okelah kalo begitu…!! ”